【最後一段路】
2016年11月15日(二)
身份證70歲、實際年齡76，但我以為佢已經86歲。
今日係我第一次上門探佢，丈夫患肺癌同心臟病已住院個半月；原本4-5人嘅住屋單位，一早只剩返佢自己一個。
眼前嘅佢，應該唔夠65磅，同我講嘢時不停用手按住心口，吸呼急促！枱面有一兜燒賣、一碗墨丸河、兩杯唔同牌子雪糕，一杯綠茶、一杯雲呢拿，全部頭先自己落街買，但全部食唔落。
我問需唔需要幫佢叫白車？佢話唔需要，呢啲係佢做手術後嘅後遺症；兩年前，佢證實患上胃癌同腸癌，每樣割走咗一半。
長者離院支援計劃機構同事結束短暫送飯服務後將佢轉介俾我，要求義工探訪；但我個人第一眼已肯定，佢更加需要一間老人院！
佢係老公第二任太太，有個由一歲幾開始湊大嘅繼仔，做懲教署，每個月會嚟探佢一次，俾$2000家用佢。
養到四十幾歲，每年探佢唔過十次；做懲教署，每月只會俾$2000佢；每兩個月到醫院覆診，都係佢自己一個搭的士去！
佢擔心冇能力負擔昂貴嘅私家老人院費用，因佢只領取長者生活津貼...
我表示會同佢個繼仔商量，盡量幫佢諗諗辦法。
我睇見佢牆上六十幾歲時影嘅相，當年佢應該超過160磅！仲有一隻可愛嘅貓貓過膠相…
「隻貓已經死咗好耐！我都快㗎喇！姑娘，我後生時好靚㗎！」
佢遞俾我睇一張廿幾歲嘅黑白相…
婆婆，妳真係好靚...
但願，我能為妳作一個最好嘅安排，讓妳可以安心地走完人生最後一段路。
Search